7 главни модели на ташни за лето

Не можете да се снајдете во морето од возбудливи понуди за најважниот модет детаљ? Без гајле, Runway ќе ви помогне во вашиот избор!

Згужвана

Меката правоаголна торба без рачки носете ја превиткана и, по можност, стисната во раката. Внимајте да не ја преполните. Модните писти се преплавени со вакви модели во сите големини и од сите можни материјали, со гумени апликации, долги реси или во металик нијанси. Само една нема да ви биде доволна.

Дизајнери за инспирација: Céline, Dries van Noten, Burberry Prorsum, Calvin Klein, Osman, Eudon Choi, Philosophy Alberta Feretti.

Дотерана кеса

Личи на пластичните кеси кои ги носите од супермаркетите, но се разбира, многу е поскапа од нив. Ако сте една од оние девојки кои мораат да носат сѐ со себе, таа е идеален избор за вас. Весело, малку иронично и пред сѐ, забавно.

Дизајнери за инспирација: Ashish, Holly Fulton, Vivienne Westwood, JW Anderson.

Околу половината

Враќање во 90-тите. Со апликации или цветен принт, можат да бидат неочекувано женствени, а најдобрата страна во приказната е дека рацете ви остануваат слободни за телефон, сладолед или за уште една ташна. Заборавете на шегите на нивна сметка. Овие ташни се повторно во мода.

Дизајнери за инспирација: Marni, Emilio Pucci, Tory Burch, Wunderkind.

Како бразлетна

Има ли нешто попрактично од ташничка што ви е закачена околу раката? Не претерувајте со големината, ако не сакате на крајот на денот да се чувствувате како да сте заглавиле со часови на вежбање. За преку ден одлучете се за класични дезени или еднобојна кожа, а навечер за поекстравагантни модели. Сите други додатоци во комбинација со ваква торбичка се одвишок.

Дизајнери за инспирација: Givenchy, Narciso Rodriguez, Valentino, Olympia le Tan, Cividini, Diesel, J Mendel, Zimmermann, Pascal Millet, Hash, Ground Zero.

Минијатура

Толку е мала што тешко се забележува. Всушност, не сме ни сигурни дали е навистина ташна, но тоа не нѐ спречува да ја прогласиме за едно од најпосакуваните парчиња. Најдобро изгледа во впечатливи бои и материјали. Преостанува да провериме дали можеме да преживееме ако со нас се само кредитните картички и клучевите.

Дизајнери за инспирација: Chanel, Vionnet, Mila Schön, Saint Laurent, Dolce&Gabbana, Hermès, Alice + Olivia.

Ранец

Големиот Карл го оживеа под знамето на Chanel. Беше направен од луксузна кожа или од спортски хај-тек ткаенинини. Тој е апсолутен хит за оваа сезона. Ќе се запрашате како воопшто сте можеле без него.

Дизајнери за инспирација: Marc Jacobs, Chanel, Marios Schwab, Manish Arora, Rebecca Minkoff, Cristopher Reaburn, Ostwald Helgason.

Во форма на кофичка

Мека, со долг ремен и врвца на врвот. Оваа ташна едноставно бара да биде украсена. Дали најдобро и одговараат ретро исписи, разнобојни реси или вткаени шари, оценете сами. Не им ја препорачуваме на девојките кои се опседнати со прегради и целосен ред во ташната.

Дизајнери за инспирација: Concept Korea, Louis Vuitton, Chloé, Giorgio Armani, Vanessa Bruno, Paul & Joe, Moschino.