Факт е дека не можеме да ја заштитиме косата од сите негативни фактори кои секојдневно влијаат на нејзината структура и состојба, но постојат и онакви за кои и самите сме главни и единствени виновници. Сигурни сме дека имате барем една од овие лоши навики, а сега е време да станете свесни за нив и да престанете да ги правите.
Триењето на мократа коса со пешкир е само една од нив и затоа погледнете кои се навиките кои и штетат на вашата коса и кои треба да ги исфрлите од вашето секојдневие.
1. Чупкање на врвовите на косата
Знаеме дека барем еднаш сте се фатиле себеси како ги гледате краевите од косата и ги чупкате оние кои се расцветани. Не мислете дека со ова сте и направиле услуга на вашата коса! Ваквото чупкање може само да предизвика нови оштетувања на влакната, и нема да ги отстрани веќе постоечките, затоа ослободете се од оваа навика.
2. Компулсивно врткање на косата
Уште една навика која можеби уживате да ја правите кога ви е досадно, а тоа е компулсивно врткање на праменчиња околу прстите. Ова е обично поврзано со стрес и нервоза, но постојат и други издувни вентили кои не подразбираат малтретирање на косата на овој начин.
3. Избегнувате шишање
Јасно е дека сакате долга коса, но освен должината од клучна важност е косата да биде здрава. А тоа што избегнувате посета на фризерскиот салон сигурно не придонесува за нејзиното здравје. Кратењето на оштетените краеви на секои 4-6 месеци е неопходно за косата да биде здрава. Не мора да скратите многу – само оштетените краеви. Нема да изгубите многу од должината, а косата ќе биде препородена.
4. Пречесто и предолго чешлање
Се разбира, косата треба да се чешла за да се одмрсат заплетканите влакна, но не треба да се претерува. Предолгото чешлање може да предизвика опаѓање на здравата коса и оштетување на влакната. Неколку потези со четката со природни влакна ќе биде сосема доволно.
5. Опавче или пунџа 7 дена во неделата
Веруваме дека меѓу вас има и од оние кои најмногу сакаат да ја фатат косата во опавче или пунџа. Но треба да знаете дека секојдневното стилизирање на косата на овој начин влијае на нејзиното оштетување и зголемено опаѓање. Пуштете ја косата барем секој втор ден за циркулацијата нормално да функционира и коренот од влакната да ги прими потребните хранливи материи. Исто така, подеднакво лошо е и да спиете со фатена коса. Доколку навистина ви пречи сплетете ја косата во плетенка.
6. Чешлање на мокра коса
Единствено што смеете да и правите на косата додека е мокра е нежно да ја исцедите и да ја замотате во мек пешкир. Никако не триете ја и не чешлајте ја додека е мокра. Тогаш косата е многу слаба и склона кон распукување.
7. Комбинирање на лак за коса и преса
Лакот за коса содржи алкохол во повеќето случаи кои во контакт со топлината на пресата ја горат и оштетуваат косата. Секој пат пред употреба на фигаро или преса нанесете производ за заштита на косата од топлина, а потоа ставете лак.
You must be logged in to post a comment Login