Што го нарушува, а што го спасува бракот

Најчести причини за прекин на бракот се лошата комуникација, недостаток на блискот и насилството во било кој облик. Комуникацијата е показател за квалитетот на добриот однос помеѓу партнерите. Парот обично не е спремен да разговара за различните очекувања во бракот. Се караат околу тривијалности а всушност тоа е параванот зад кој се кријат важните проблеми, дали се надевале на рамноправни односи, или дека еден од нив ќе биде доминантен и што е тоа што очекуваат еден од друг. За тоа тешко се зборува а тоа е суштината на односот. Психотерапевтите советуваат, комуникацијата се усовршува, се учи, постои начин како се соопштуваат нештата на партнерот. Треба да се обрати внимание дека кога се разговара треба да се слушне што партнерот има да каже, не само да се напаѓа. Вреќањето да се замени со објаснување со цел да се избегне ефектот на бес кај партнерот. Да не се заборави почитувањето, тоа е сепак личноста со која живееме, да се каже она што смета без разлика дали тоа ќе му се допадне на партнерот. Недостаток на блискост обично се јавува по раѓањето на детето. Мајката е посветена на детето, партнерот се чувствува запоставен. Тој се посветува се повеќе на работата или на активности кои се надвор од семејството. Овој проблем може да се јави и подоцна, кога детето ќе порасне, се дотогаш обврските околу детето го маскирале овој проблем. Решението е сепак во разговорот и обидот од страна на двајцата партнери да направат се за да зближат. Да се грижат заедно околу детето, да имаат активности во кои и двајцата ке бидат вклучени но и да најдат време и за заеднички моменти кои ќе ги поминат сами. Различните облици на насилство се причина за прекин на бракот. Еден од најчестите е алкохолизмот кај еден од партнерите. Решението е возможно да се најде само доколку навремено се обратат кај стручно лице за помош. На почетокот, постои срам да се каже на било кого дека постои насилство и постои надеж дека тоа е инцидентно и дека никогаш нема да се повтори. Некогаш се премолчува поради финансиска зависност. Но доколку навреме се побара помош, со терапија насилството може да се прекине.