Лошиот брак може да ве убие

Познато е дека незадоволството во бракот ги прави луѓето несреќни. Но сега истражувачите тврдат дека крајниот резултат може да биде фатален.

Американските истражувачи веруваат дека несреќниот брак може да предизвика стрес кој може лошо да влијае на менталното здравје на партнерите. Тие веруваат дека луѓето кои се несреќни со своите партнери имаат поголем ризик да заболат од депресија, висок притисок и болести на срцето.

Резултатот, велат научниците од универзитетот во Мичиген, е пресуден во моментот кога секоја втора личност има проблеми со срцето. “Идејата ни е да пронајдеме валидни докази како бракот влијае на здравјето на срцето и да ги објасниме механизмите во врската. Резултатите ќе имаат значително влијание на работата во пракса”, вели др. Хиу Лиу, лидер на ова истражување.

Таа објаснува дека научниците имаат причина да веруваат дека бракот е најважната општествена врска која влијае на нашето здравје. Исто така верува дека среќниот брак внесува среќа во животот и помага на физичкото и психичкото здравје.

Од друга страна пак, стресот во лошиот брак носи депресија. Ова пак може да поттикне нездрави навики – алкохол и цигари, кои го подигнуваат нивото на хормоните на стресот.

Хормоните на стресот директно влијаат на крвниот притисок и водат кон болест. Ова не е прва ваква студија на оваа тема, неодамна една студија која се занимавала со поддршката помеѓу партнерите, исто така дала резултати дека партнерите кои не се чувствуваат поддржано од својот брачен другар, почесто заболуваат од болести на срцето.

Друга, исто така неодамнешна студија, дава резултати за позитивното влијание на среќниот брак на коските на мажите.