Кога не ви се готви од топло: 5 ладни салати

Сечкајте и мешајте разни вкусови, наместо да пржите. И онака на овие високи температури никој не сака мрсна храна.

За да се спасите од потење додека правите ручек, ви предлагаме да направите некоја од овие 5 ладни летни салати:

Салата од туна

Потребно ви е:

• 2 конзерви туна
• 3 шолји ориз
• 300g мајонез
• 400g павлака
• 300g кисели краставички

Подготовка:

Оризот сварете го и помешајте го со туната, па на крај додајте ги краставичките исечени на коцки. Промешајте заедно со павлаката и мајонезот. Оладете и послужете.

Печени пиперки во павлака

Потребни состојки:

• 6-7 печени црвени пиперки
• 2-3 варени јајца
• 400g кисела павлака
• 100g мајонез
• Сол и зачини по желба

Подготовка:

Испечените пиперки исчистете ги и ситно исечкајте ги. Постапката повторете ја со јајцата, па измешајте. Додадете ја павлаката и мајонезот, па зачинете по желба.

Бела салата

Потребно ви е :

• 2 компири
• 200g мајонез
• 170g крем сирење
• 400g павлака
• 150g шунка
• 100g кашкавал
•  3 јајца

Подготовка:

Измешајте го мајонезот со половина од павлаката и чувајте го за филување. Изрендајте го компирот, посолете, па наредете го на дното на еден стаклен сад. Премачкајте со мајонез и павлака, а потоа наредете ја ренданата шунка измешана со крем сирењето. Пак филувајте со мајонез и павлака, а потоа додадете ги ренданите јајца и кашкавалот. Премачкајте со останатата павлака.

Салата со јајца, печурки и пченка

Потребно ви е:

• 4 варени јајца
• 200g пченка
• Млад лук или кромид
• 2 големи варени компири
• 8-10 свежи, проварени шампињони
• 3 полни лажици мајонез или павлака

Подготовка:

Јајцата исечете ги на парчиња, а компирот на помали коцки. Зависно од големината, исечете ги и шампињоните на коцки или кругови. Додадете ја пченката и добро измешајте. Мајонезот измешајте го заедно со младиот кромид или лук исечен на кругови, па соединете ги со останатите состојки.

Салата од њоки и тиквички

Потребно ви е:

• 1 пакетче њоки
• 1 мала тиквичка
• 1 црвена пиперки
• 5 лажици маслиново масло
• 2 лажици доматно пире
• 4 лажици пилешка супа
• Сол и бибер

Подготовка:

Сварете ги њоките, а зеленчукот измијте го и исчистете го. Тиквичката исечете ја на текни кругови, а пиперката на тенки стапчиња и се заедно помешајте со маслиновото масло. Доматното пире измешајте го со супата додека не добиете прелив. Додајте во садот со тестенини и зеленчук, оладете и послужете.