Домашно трилече

Ретко кој не слушнал и кој не го пробал овој сочен и превкусен десерт, па повелете еден испробан рецепт за домашно трилече.

СОСТОЈКИ:

За пандишпан:

6 јајца

300 гр шеќер

1 ќесичка ванилин шеќер

300 гр брашно

1 ќесичка прашок за пециво

За прелив од млеко:

1 л млеко

750 мл слатка павлака (нематена павлака)

250 мл млеко за кафе (10 % масленост)

За премачкување:

По желба, може готов карамел крем.

ПОДГОТОВКА:

Одделете ги белките од жолчките. Изматете ги белките и шеќерот цврсто како шлаг и додавајте ги жолчките една по една, а при тоа не престанувате со матење се додека смесата убаво не се соедини. Потоа додајте го брашното заедно со прашокот за пециво и измешајте со голема лажица или жица. Смесата ставете ја во претходно намрсен и набрашнет плех 35х20х6 см. Ставете го да се пече околу 10 минути во загреана рерна на 200 степени, па намалете ја темературата на 180 и печете уште 20 минути. Готовиот пандишпан оставете го да се лади, но не премногу, треба да биде млак, а во меѓувреме измешајте ги сите видови на млеко. Млакиот пандишпан превртете го врз крпа и во плехот ставете половина од измешаното млеко. Во него така превртен ставете го пандишпанот и потоа дотурете го останатото млеко. Пандишпанот оставете го околу 2 часа за да впие од млекото, па исечете го на коцки, покријте го со фолија и ставете го во фрижидер неколку часа за добро да се разлади. Пред сервирање секоја коцка мачкајте ја со готов карамел.

На здравје!