Во последните години, маслото од рузмарин стана еден од најбараните природни препарати за нега на косата. Бројни истражувања укажуваат на тоа дека рузмаринот може да ја поттикне циркулацијата во скалпот, што го подобрува снабдувањето на корените на косата со хранливи материи и помага во намалување на опаѓањето на косата. Поради ова, тој сè почесто се наоѓа во составот на шампони, серуми и масла наменети за зајакнување на косата.
Покрај тоа што го поттикнува растот на нова коса, маслото од рузмарин помага во одржување на здрав скалп и може да ги ублажи првутот и чешањето. Со редовна употреба, косата станува помека, посјајна и поотпорна на кршење, што резултира со поубав и погуст изглед.
Најдобро од сè е тоа што ова природно масло можете лесно да го подготвите дома, користејќи само неколку состојки.
Како се подготвува масло од рузмарин?
Ќе ви бидат потребни една рака сушен рузмарин, квалитетно маслиново или бадемово масло и чиста стаклена тегла.
Темелно измијте ги гранчињата свеж рузмарин и оставете ги целосно да се исушат. Отстранете ги листовите од стебленцата и ставете ги во чиста, сува тегла. Прелијте ги со маслиново или бадемово масло, така што целосно ќе бидат потопени. Затворете ја теглата и оставете ја на топло место или на сонце 3 до 4 недели, притоа повремено протресувајќи ја.
Откако маслото ќе ја добие својата карактеристична боја и мирис, процедете го низ газа и ставете го во шише од темно стакло.
Како да го користите маслото од рузмарин за косата? Пред миење на косата, нанесете неколку капки масло на скалпот и нежно масирајте со врвовите на прстите 5 до 10 минути. Оставете го да делува најмалку 30 минути – или дури и неколку часа, по ваша желба – а потоа измијте ја косата со благ шампон.
За најдобри резултати, се препорачува да го користите 2 до 3 пати неделно, во текот на најмалку три месеци, бидејќи на природните производи обично им е потребно повеќе време за да го покажат своето дејство.
