Италијанскиот производител на луксузни спортски автомобили Ферари во вторникот објави дека договорил 106 милиони евра државна помош за инвестиции во технологија и производство во матичниот регион Емилија-Ромања.
Компанијата ќе ги добие парите според меморандумот за разбирање (МоУ) потпишан со Министерството за економија, државната инвестициска агенција Invitalia и владата на Емилија-Ромања.
Договорените 106 милиони евра за поддршка ќе бидат инвестирани во индустриски проекти, истражување и развој на нови технологии кои треба да ја забрзаат дигитализацијата и да го намалат влијанието врз животната средина, се вели во соопштението.
Од Ферари посочуваат дека државната поддршка ќе овозможи отворање на 250 нови работни места и ќе биде од голема помош за регионот околу Маранело и Модена.
„Ние веруваме во нашиот регион и сме решени да му помогнеме да развие проекти кои ќе донесат опипливи придобивки, од социјален и еколошки аспект, и ќе ја подобрат неговата конкурентност“, рече извршниот директор на Ферари, Бенедето Виња.
