Дали ова ЌЕ отфрли уште еден стереотип, оној за несигурноста на италијанските автомобили?
Тешко, бидејќи тоа е Maserati, бренд чии производи малкумина можат да си ги дозволат, но сепак е важно што е направен првиот чекор. Впрочем, ваквата одлука јасно укажува на подготвеноста на италијанскиот производител за длабоки промени.
Не многу брендови се подготвени да понудат десетгодишна гаранција.
Токму така, Maserati одлучи да понуди дополнување на стандардната гаранција од четири или пет години нудејќи услуга на продолжена гаранција, со што ќе застане покрај брендовите со најдолга гаранција предводени од оние од Кореја и Јапонија.
Тоа е програма за гаранција Extra10, која ги опфаќа погонските компоненти, вклучувајќи го моторот и менувачот. Исто така, во програмата е вклучена и услугата за подигање на автомобилот и негово враќање од сервис на домашна адреса.
Новата гарантна услуга ќе се нуди од 1 октомври на одбрани пазари. Не е познато дали ќе биде достапен на претстојните електрични модели, вклучувајќи го и електричниот GranTurismo наречен Folgore.
