Барби, најпознатата кукла на светот, која годинава наполни 61 година, знае како да остане актуелна. Иако уште од самото основање е обвинувана за влевање недостижни идеали за убавина кај девојчињата уште од најрана возраст, нејзините производители се обидуваат да ја задржат Барби популарна и да го следат духот на времето.
Во нејзиниот долг живот, вечно младата Барби имала различни кариери, покажувајќи дека жените можат да ги извршуваат сите работи, па затоа таа била стјуардеса, доктор, пилот и возач на Наскар (меѓу другото).
Последен во серијата може да се додаде и активист. Имено, Барби на својот Јутјуб канал, кој брои 9,7 милиони следбеници, реши да зборува за, како што вели, тешки теми. Таа разговара со својата пријателка Ники за расизмот и привилегиите на белците, користејќи примери од секојдневниот живот. Нејзината пријателка Ники споменува дека иако имала најдобри резултати на француски јазик, професорката изјавила дека само имала среќа. Барби е исто така шокирана кога дознава дека, додека тие се натпреварувале кој ќе продаде повеќе налепници на плажа, Ники повеќепати била запрена од полицијата, која ѝ барала дозволи итн. На овој начин Барби се обидува на младата публика да ѝ ги приближи актуелните општествени теми и да ги појасни проблемите кои се главниот двигател на Black Lives Matter движењето.
Покрај политичките прашања на аполитички начин, во нејзиниот влог Барби допира и на теми како што е грижата за себе во ситуации кога луѓето не сакаат да ни дадат признание за идеи и што да правиме кога се чувствуваме лошо и безволно.
Иако звучи како оксиморон, Барби е „woke“ и свесна дека треба да се справи со денешните проблеми пред сѐ и најважно, преку зборување за нив, и станува сѐ подобар пример за малите.
