Њутн-Џон и Траволта стекнаа меѓународна слава кога ги играа Сенди и Дени во сега култниот филм „Брилијантин“ во 1978 година. Тие улоги ги поврзаа засекогаш и останаа пријатели.По тридецениска борба со ракот, вчера на 73-годишна возраст почина актерката Оливија Њутн-Џон. Нејзиното семејство објави дека Оливија починала во нејзиниот ранч дом во Јужна Калифорнија. Од Оливија на социјалните мрежи се прости и нејзиниот партнер од „Брилијантин“ Џон Траволта. „Најдрага моја Оливија, ти ги направи нашите животи многу подобри!
Твоето влијание беше неверојатно. Те сакам многу. Ќе се видиме повторно на крајот од патот и ќе бидеме заедно. Твој, откако првпат те видов,твој засекогаш! Твојот Дени, твојот Џон“, напиша Траволта на Инстаграм и објави фотографија од Оливија од нејзините помлади денови. Њутн-Џон и Траволта стекнаа меѓународна слава кога ги играа Сенди и Дени во сега култниот филм „Брилијантин“ во 1978 година.Тие улоги ги поврзаа засекогаш и останаа пријатели. Пред само неколку години, парот ги повтори своите улоги за специјална вечер во Вест Палм Бич, Флорида. Оливија потоа повторно го облече препознатливото жолто здолниште од филмот, а Траволта на сцената се појави во класична кожна јакна и со фризурата што ја имаше во „Брилијантин“. – Снимањето беше забавно, но со филмовите никогаш не се знае дали ќе и се допадне на публиката или не, дури и да им се допаѓа на актерите и екипата. Неверојатно е што сè уште трае, но не само тоа, не покажува знаци на запирање. Кажувате „Сенди и Дени“ и луѓето веднаш знаат за кого се работи – изјавила Оливија во интервју за Форбс во 2018 година.
