Ако требаше да избереме една колекција од сезоната пролет-лето 2020 што не воодушеви, тоа е дефинитивно Alexander McQueen! Креативната директорка на куќата, Сара Бартон, претстави модна симфонија проткаена со детали кои зборуваат за богатото наследство на куќата, модни форми по кои е препознатлив овој бренд, но и суптилни пораки за темпото со кое се движи модната индустрија. Со оваа колекција, Бартон сакаше да предупреди дека како колектив треба да забавиме, да застанеме и да уживаме во она што го имаме. Така, целиот нејзин тим учествуваше во креирањето на колекцијата со цел сите да дадат придонес кон нејзината реализација на одреден начин, а материјалите користени при креирањето се остатоци од претходните проекти. Одржливиот развој мора да стои рамо до рамо со луксузната мода.
Цветниот мотив што се појави како спомен – основачот на куќата e голем љубител на природата, како и сегашниот креативен директор кој го продолжи своето наследство. Мотивите на цвеќето што се појавија во колекцијата се видови на кои за жал им се заканува истребување како резултат на сè драматичните климатски промени. Креативниот тим бил испратен во оранжериите каде детално ја нацртаа загрозената флора чии форми беа рачно извезени на фустани од муслин и костуми. Нацртаните панели биле внимателно пренесени на материјалот, со цел точно да се наведе каде ќе падне секој цвет на парчето облека. Со своите експресивни бои, Endangered Flowers и дадоа на колекцијата комплетно нова димензија, дефинирана со сурова убавина, но и со значајна порака.
