Вчера, на официјалниот Инстаграм профил на брендот беше објавено соопштение во кое се објаснува дека дизајнерката починала, мирно и опкружена со своето семејство, во Клафам, Јужен Лондон.
Во текот на неколку децении од нејзината кариера, Вествуд ја дефинираше британската мода со нејзиниот ексцентричен дизајн, стил и еколошки активизам. Како што се наведува во соопштението, врвната дизајнерка починала мирно во својот дом опкружена со семејството. Нејзиниот сопруг Андреас Кронталер по веста за нејзината смрт изјави: „Ќе продолжам да дизајнирам со Вивиен во моето срце“.
„Вивиен продолжи да ги прави работите што ги сакаше до самиот крај, работејќи на својата уметност, пишувајќи ја својата книга и менувајќи го светот на подобро. Таа живееше неверојатен живот. Иновациите и нивното влијание во изминатите 60 години беа огромни и ќе продолжат и во иднина“, се наведува во текстот.
Вествуд е роденa во 1941 година во Тинтвистл, Англија. Во 1958 година нејзиното семејство се преселило во Хароу, кога таа се заинтересирала за модата со следење на курс за накит и сребрен прибор во уметничкото училиште, сега познато како Универзитетот во Вестминстер, но набрзо се откажала. Работела накратко како наставничка во основно училиште додека истовремено создавала свој накит и го продавала од тезга на патот Портобело. Вествуд го запознала својот прв сопруг Дерек Вествуд во 1962 година и се омажила за него истата година во венчаница што самата ја направила на 21-годишна возраст.
Вествуд стана надалеку позната во светот на модата во 70-тите по нејзините андрогени дизајни и маици со слоган. Нејзиниот активизам се пренесе на модната писта бидејќи не се двоумеше да расветли прашања кои ја интересираа, како што се климатските промени, преку нејзините колекции.
Во својата кариера, таа облече некои од најголемите имиња во модата и Холивуд, додека стана референтна точка за оние кои го сакаа панк движењето. Во нејзините први колекции таа ја дефинираше естетиката на панкот, изразувајќи ја генерацијата која бараше нов начин на изразување. Вивиен Вествуд со својот стил и личност со право го заслужи своето место во пантеонот на најпознатите модни дизајнери.
