Пивскиот бренд Корона се здружи со агенцијата MullenLowe LA и легендарниот рапер Снуп Дог за да ја лансира својата најнова кампања насловена “La Vida Más Fina” или „Најдобриот живот“.
Целосно интегрираната кампања е осмислена да ги обедини сите пивски вкусови од брендот Корона и има за цел да даде еден нов и пооптимистичен поглед кон животниот стил кој го застапува брендот, поттикнувајќи нé да уживаме во моментите и да наоѓаме радост и во малите работи.
„Не можете да изберете сé во животот, но секогаш можете да изберете да го пронајдете доброто во животот. Со сé што се случува во светот, тоа е перспектива која луѓето можеби навистина имаат потреба да ја слушнат токму сега. Здружувањето со бренд како Корона за да се охрабрат луѓето да најдат повеќе од доброто во животот, тоа е La Vida Más Fina,“ истакна Снуп Дог по повод лансирањето на кампањата.
Кампањата беше лансирана на социјалните онлајн профили на компанијата, заедно со специјализирана колекција на анимирани слики преку платформата GIPHY. Таа ќе вклучува и телевизиски реклами од 15 и 30 секунди, како и повеќе дигитални и ПР активности. Од компанијата најавија дека наскоро во кампањата ќе бидат вклучени и други познати личности.
