Ако ви недостасува брендот Vertu и целата нивна магија, имаме одлични вести за вас…
Поранешниот директор за дизајн на овој бренд, Хач Хачинсон, заедно со неколку поранешни вработени, одлучил да лансира ексклузивни паметни телефони преку неговиот нов бренд, Xor. Хачинсон го претстави Xor Titanium како прва новина на брендот. Дизајниран како ретро верзија, телефонот нуди говорни повици преку 2G/3G конекции, како и СМС пораки. Понатаму се одликува со активна заштита од бучава, безжично полнење и батерија што може да трае пет дена со само едно полнење.
Со главен фокус на сајбер безбедноста, уредот Xor е идеален за деловна комуникација. Две лица кои поседуваат ист модел на телефон ќе можат да зборуваат и разменуваат пораки со енкрипција на ниво на хардвер. Уредот исто така ви овозможува да поставувате различни мелодии за шифрирани и редовни повици, и доаѓа со специјален клуч за бришење податоци од далечина.
Естетски, моделот Xor Titanium изгледа како старата Nokia. Се произведува во Европа и ќе чини 3.900 американски долари, додека датумот на испорака на првите модели најверојатно е во првиот дел од следната година.
