„Once-in-a-Lifetime“ патување кое ќе ви го „украде“ срцето.
Не постои човек кој не сака патување. Кој не сака да запознава нови места, волшебни пејзажи и луѓе од различни култури? Вистина е дека авионот е најпознатото превозно средство кое повеќето луѓе го избираат кога прават план за одмор. Но, што е со патувањето со воз?
Ако сте страствен авантурист или само сакате да излезете од вашата комфорна зона, патувањето со воз ќе биде навистина посебно искуство за вас што ќе ве фасцинира и што ќе го паметите до крајот на животот.
Ги одбравме петте најубави луксузни возови со најинтересни рути и ви ги претставуваме во фотогалеријата.
BRITISH PULLMAN
British Pullman, легендарниот воз, ви ветува незаборавно патување низ Велика Британија, кое ги вклучува нејзините најубави дестинации. Возот своето прво патување го имаше во 1920 година и покрај тоа што поминаа толку години, успеа да ја задржи својата автентичност и да се истакне со својата посебна естетика. Накратко, она што треба да го очекувате доколку го изберете е луксузна, гламурозна турнеја низ британските села која ќе ве одведе во друга ера. Покрај тоа, гостите имаат на располагање богато мени кое вклучува голем број деликатеси, но и пијалоци кои го прават патувањето уште попријатно. Што и да одберете, тоа е секако многу посебно искуство што секој заслужува да го доживее.
BELMOND GRAND HIBERNIAN
Со раскошот како заштитен знак, со класична естетика која ги освојува срцата на посетителите од првиот момент, Belmond Grand Hibernian се рангира високо на листата на најспецијалните возови во светот и тоа не неправедно! Во него ќе најдете некои од најпознатите слики кои љубителите на уметноста мора да ги видат и кои на просторот му даваат поинакво чувство, со неговите светли, смели бои. Овој воз прави долги патувања главно низ Ирска. Еден од нив вклучува и застанување во дестилеријата каде се прави познатото виски Џејмсон, во замокот Бларни и градините, но и во поморскиот музеј Титаник во Белфаст.
THE PRESIDENTIAL TRAIN
Ако резервирате патување со „Претседателскиот воз“, ќе добиете обиколка на најинтересните делови на Португалија со воз што превезува претседатели, шефови на држави, кралеви и некои од најпознатите светски лидери повеќе од еден век. Тоа е уникатно целодневно искуство, кое вклучува посета на долината Дуро и Квинта до Везувио, каде што можете да уживате во дегустација на вино и феноменална гастрономија. Бројот на седишта за овој воз е ограничен, бидејќи патувањата се одржуваат само 25 дена во годината.
VENICE SIMPLON ORIENT EXPRESS
Еден од најпознатите возови повторно е подготвен да ги пречека патниците и да им овозможи уникатно искуство кое засекогаш ќе остане врежано во нивната меморија и срце. Venice Simplon Orient Express ќе ве однесе до волшебни дестинации низ пријатни рути, кои го прават ова патување единствено во својот вид. Традиционалната рута меѓу Париз, Лондон и Венеција се уште е на врвот на листата, а сега нуди патувања до Виена, Прага, Истанбул и Будимпешта. Доколку сте љубители на идилични пејзажи и сакате луксуз и италијанска префинетост, ова сигурно ќе ви се допадне!
GOLDEN EAGLE ОД МОСКВА ДО ВЛАДИВОСТОК
За повеќето, ова е најважното патување со воз во светот. „Златниот орел“ поминува уникатна рута низ Русија, која ги поврзува истокот и западот, од Москва до Урал. Патувањето се одвива покрај величествената и бескрајна степа и покрај брегот на најголемото езеро во светот. Што е вклучено? На почетокот гостите имаат можност да изберат што сакаат од богатото мени кое вклучува вкусни јадења и пијалоци за сите вкусови. Програмата вклучува приватна обиколка на Кремљ и застанување на Бајкалското Езеро каде се прави скара, а кој сака може да заплива во неговите ледени води.
