Грозјето е овошје полно со корисни состојки кои го зајакнуваат срцето, ја зголемуваат енергијата и го штитат телото од слободни радикали.
Грозјето е едно од најомилените овошја што пристигнува на крајот од летото. Без разлика дали ви се допаѓа црно, бело или црвено, секоја сорта носи богатство од вкусови и здравствени придобивки.
Сепак, иако е полно со добри состојки, грозјето е овошје кое треба да се јаде умерено.
Богато со антиоксиданси и витамини
Грозјето е ризница на антиоксиданси, особено ресвератрол – соединение кое се наоѓа претежно во темното (црно и црвено) грозје. Ресвератролот е познат по своите антиинфламаторни и заштитни ефекти врз срцето и крвните садови. Покрај тоа, грозјето содржи витамин Ц, витамин К, калиум, па дури и помали количини на влакна, особено ако се јадат со кора и семки.
Придонесува за здравјето на срцето и крвните садови
Редовната, умерена консумација на грозје може да придонесе за намалување на крвниот притисок, подобрување на циркулацијата и намалување на лошиот холестерол.
Благодарение на флавоноидите, грозјето помага во одржувањето на еластичноста на крвните садови и може да го намали ризикот од згрутчување на крвта.
Природна енергија, но и шеќери
Поради високата содржина на природен шеќер (гликоза и фруктоза), грозјето е одличен извор на брза енергија.
Сепак, токму поради оваа причина, треба да бидете внимателни со количината, особено за луѓе со висок шеќер во крвта, дијабетес или инсулинска резистенција. Иако е природен, шеќерот од грозјето може да предизвика ненадејни скокови на гликозата во крвта ако се консумира во големи количини.
Колку грозје е доволно?
На здравите луѓе им се препорачува да јадат порција грозје од околу 150-200 грама дневно, што е околу една шака. Ова е сосема доволно за да се искористат хранливите придобивки без да се претерува со внесот на шеќер. Идеално е да се јаде наутро или пред физичка активност, кога на телото му е потребна дополнителна енергија.
Кому не се препорачува да претерува?
Лицата со дијабетес, како и оние кои се обидуваат да ослабат, треба да го ограничат внесот на грозје и да го комбинираат со друга храна богата со растителни влакна и протеини, со цел да се ублажи влијанието врз нивото на шеќер во крвта.
Исто така, поради содржината на фруктоза, прекумерните количини грозје може да предизвикаат надуеност или стомачни тегоби кај некои луѓе.
