Научниците во нов извештај истакнаа дека подобрата стоматолошка нега и секојдневното користење на конец за заби може значително да го намалат ризикот од повеќе од 50 сериозни болести, помагајќи во одржувањето на здрави заби и непца, а со тоа и на целото тело.
Бактериите од заразените непца можат да се шират низ целото тело и евентуално да ја преминат крвно-мозочната бариера, потенцијално зголемувајќи го ризикот од когнитивен пад и деменција, предупреди Алпдоган Кантарџи, професор по стоматологија на Универзитетот во Минесота, на состанокот на Американското здружение за унапредување на науката (AAAS) во Феникс, Аризона.
Редовното чистење на забите и непцата го намалува воспалението кое е поврзано со здравствени проблеми како што се дијабетес, деменција, срцеви заболувања, ревматоиден артритис и воспалителни заболувања на цревата.
Експертите забележуваат дека иако повеќето луѓе редовно ги мијат забите, голем број од нив не користат конец за заби, што доведува до чести проблеми со кариес и заболувања на непцата.
Кантарџи предупредува дека лошата орална хигиена во многу развиени земји е слична на онаа во земјите во развој и дека е потребно поголемо инвестирање во превенција бидејќи оралното здравје влијае на целокупното здравје на целото тело.
Експертите препорачуваат миење на забите до три пати на ден за одржување на оралната хигиена и предупредуваат дека оние кои не го прават тоа го зголемуваат ризикот од штетни состојби низ целото тело, вклучувајќи го мозокот и зглобовите.
„Сега веруваме дека одржувањето на здравјето на забите може да биде поврзано со намален ризик од повеќе од 50 системски состојби“, рече Кантарчи на настанот наречен „Устата како порта кон целокупното здравје“, каде што истражувачите предупредија: „Неодамнешните докази сугерираат дека усната празнина може да влијае на здравјето на другите органи, вклучувајќи ги зглобовите, мозокот и цревата“.
Не е нужно заболувањето на непцата директно да ги предизвикало овие состојби, но се чини дека постои врска, рече тој. Некои истражувања сугерираат дека перзистентното заболување на непцата предизвикува имунолошкиот систем на телото да биде во состојба на постојана будност или воспаление, што може да го иритира мозокот.
„Истражувањата сега покажуваат дека кај луѓе со лесни или умерени болести, оние кои ги мијат и се грижат за своите заби или одат на стоматолог и имаат напредно чистење покажуваат многу подобри когнитивни реакции“, се вели на конференцијата.
Беше истакнато дека миењето пред спиење е најважно, додавајќи дека оние кои имаат проблеми треба да користат електрични четки за заби, а исто така и да го мијат јазикот.
