Единствената копија на Citroen 2CV, популарниот Spacek, чија каросерија е направена од дрво, би можел да се продаде меѓу 150.000 и 200.000 евра на аукција во Франција на 4 јуни, објавија организаторите Ајмерик и Филипе Руилак.
„Тоа е единственото дрвено возило во светот кое е во совршена возна состојба. Тоа е надвор од секоја конкуренција. Во исто време, тоа е уникатно возило и уметничко дело“, тврди Ајмерик Руилак.
Тие ја процениле цената што може да ја постигне дрвениот Spacek врз основа на „светскиот рекорд за едно 2CV“, кој е продаден за 176.000 евра. Овој модел го има „сиот потенцијал да го надмине тој рекорд“, вели Руилак.
Аукцијата ќе се одржи во Монбазон во централна Франција. Каросеријата на 2CV тип AZKA е од 1955 година и е целосно изработена од дрвo, за кое се погрижил пензионираниот француски столар Мишел Робилар.
За изработката на браниците се користело ореово дрво, каросеријата од дрво од круша и јаболко, а вратите и капакот на багажникот од дрво од цреша.
„Возилото го помина тестот за техничка контрола, има сообраќајна дозвола од 1957 година, регистрирано е, па може да оди на пат“, објасни Ајмерик Руилак.Столарот Робилард, кој веќе изработувал дрвени модели за Ferarri, почнал да прави дрвен Spacek во 2011 година.
„Посветив пет години од мојот живот, 5.000 часа работа дење а понекогаш и ноќе. 2CV излезе од мојата работилница во септември 2017 година“, се сеќава тој.
„Срцето ми потона. Но, не е важно, веќе имам друг проект во мојата глава: DS21 Cabriolet купето Chapron планирам да го завршам за 27 месеци и на тој начин да прославам 70 години од DS“, изјави Робилард.
