Да беше жива денес, принцезата Дијана веројатно уште почесто би го носела овој модел поради сите новитети кои се воведени.
Покојната принцеза од Велс Дијана, меѓу другото, остана запаметена и по нејзиниот исклучителен стил на облекување, кој беше подеднакво волшебен и во најсвечените моменти и во лежерните ситуации.
Лејди Ди до денес е одлична модна инспирација, како за трендсетерките, така и за дизајнерите, а на социјалните мрежи особено е популарен нејзиниот секојдневен начин на облекување.Кој друг може да ги заборави фотографиите на Дијана како се шета во и дуксер и бициклистички додека ги држи клучевите во уста и претура низ нејзината чанта?
Иако ретко повторува парчиња, принцезата Дијана ја имаше и својата омилена облека и чевли на кои понекогаш се навраќаше.
Меѓу нив секако беа и велурните мокасини кои таа често ги носеше во текот на деведесетите и кои се многу тренди веќе неколку сезони. Минатата година мокасините беа меѓу трите најпребарувани модни артикли на Google, а се очекува и оваа година да бидат многу популарни.
Изборот на принцезата Дијана беа мокасини со потпис на италијанската модна куќа Tod’s, поточно моделот Gommino, едноставни чевли со класичен дизајн и рамен ѓон.Овие чевли за прв пат беа претставени во 1978 година и веќе беа класика кога Ди ги откри, тие се удобни, практични, одат со секој стил и ги сакаат и мажите и жените.Најновите модели на мокасини Gommino се целосно рачно сошиени и имаат карактеристични гумени топчиња на ѓонот во светли бои, од жолта до лилава.
Тие горе-долу го задржаа изгледот што го имаа кога ги носеше принцезата Дијана, но може да се персонализираат: брендот ви нуди да изберете материјал, боја, гумени топчиња, детали во форма на токи, па дури и метод на шиење. .
На некој начин, вие станувате свој дизајнер. Замислете само што би направила Лејди Ди кога би имала таква опција…
