Бернард Арно, претседателот и извршен директор на компанијата LVMH, неодамна се искачи на првото место на листата на најбогати луѓе во светот, додека Илон Маск падна на втората позиција.
Францускиот бизнисмен, познат по своите шаховски потези и паметни маневри, се чини дека неодамна додаде една од важните историски градби на Милано во своето портфолио со недвижнини.
Станува збор за Casa degli Atellani, обележје од 15 век на Corso Magenta во италијанскиот град. Последниот имот на Бернард Арно е попознат како Ла Виња ди Леонардо, лозје и поранешна резиденција на Леонардо да Винчи.
Цената што Арно мораше да ја плати за да го купи имотот од семејствата Коди и Порталупи не е откриена, но упатените ја опишуваат сумата како „колосална“, бидејќи, покрај нејзината важност, резиденцијата од 1490 година е полна со познати ремек-дела и други предмети од артистот. Вилата од 15 век крие зелен двор во кој се наоѓа лозјето на Да Винчи, единствениот постоечки вински имот во центарот на метрополата.
Имотот му го подарил Лудовико „Ил Моро“, војводата од Милано, на Да Винчи во 1498 година додека бил во градот за да го наслика своето ремек дело „Тајната вечера“. Во 1919 година, резиденцијата во Милано ја презел сенаторот и бизнисмен Еторе Коди, чиј зет, архитект Пјеро Порталупи, го реновирал имотот. Запоставено и оштетено, лозјето од 16 реда или приближно два хектари, беше внимателно обновено во 2014 година и конечно претставено на јавноста за време на Меѓународниот саем во 2015 година што се одржа во Милано.
Од повторното отворање, оваа знаменитост ги пречекува посетителите и туристите и има шест апартмани за изнајмување. Исто така, резиденцијата беше домаќин на бројни приватни настани, вклучувајќи модни ревии и презентации, како и коктел приеми.
Арно, чие богатство се проценува на 181,8 милијарди долари, според Форбс, е меѓу најбогатите луѓе во светот, често во конкуренција за првото место со претприемачи како Илон Маск и Џеф Безос.
Покрај контролата на модните брендови како Dior, Louis Vuitton и Givenchy меѓу другите, LVMH поседува 26 компании во категоријата вино и алкохолни пијалоци, вклучувајќи ги и Ruinart, Dom Perignon, Moet & Chandon и Veuve Clicquot. Има и угостителско одделение, кое вклучува луксузни брендови како Cheval Blanc и Belmond.
