Јапонскиот производител на автомобили Toyota Мotor во средата соопшти дека ќе инвестира до 730 милијарди јени (5,27 милијарди долари) во производството на батерии за електрични возила во Јапонија и САД.
Производството треба да започне меѓу 2024 и 2026 година и да ги зголеми производните капацитети во двете земји за 40 гигават часови, истакнува јапонската компанија, без да прецизира информации за моменталното производство.
Фабриките на Toyota во Јапонија и Prime Planet Energy & Solutions, кои ги основаа заедно со Panasonic Holdings, ќе добијат околу 400 милијарди јени, а Toyota Battery Manufacturing во САД ќе добие околу 2,3 милијарди долари.
„Целта на инвестицијата е да и се овозможи на Toyota флексибилно да ги задоволува потребите на клиентите во сите земји и региони, нудејќи разновидни системи за возење и што е можно поширок опсег на опции“, се вели во соопштението за печатот.
Производителите на автомобили ширум светот трошат милијарди долари за да го зголемат производството на батерии и електрични возила поради построгите еколошки регулативи.
Тојота минатата година објави дека до 2030 година ќе инвестира осум милијарди јени во електрификација на своите модели, а половина од сумата планираат да ја насочат кон производство на електрични возила. И покрај ова, тие проценуваат дека до 2030 година електричните возила ќе учествуваат само со една третина од нивната сегашна продажба.
