Откако пред извесно време ве запознавме со Свалбард, Норвешка ни стана „допадлива“ цел, па овој пат од ракавите извлековме уште една извонредна дестинација која вреди да се посети. Станува збор за островот Сењ, кој заедно со оние од архипелагот Свалбард е еден од најголемите острови во Норвешка.
Населен е со 8.000 жители, и да, на овој остров можат да се доживеат сите тие слики од фјордови, бескрајно убава природа и нереални пејсажи. Северните брегови на островот се свртени кон отворено море, па мора да ги погледнете бескрајните пространства. Од друга страна, на западниот брег, карпите се издигнуваат директно од морето, а има и некои мали, рибарски села.
Најголем дел од жителите за живот ги избрале истокот и југот, бидејќи во тој дел од островот течат реки, растат шуми, а има и земја за обработка. Сењ често се нарекува „Норвешка во минијатура“, бидејќи различниот пејзаж на островот ја отсликува практично целата норвешка природа.
Главната атракција на островот е секако Националниот парк Андердален, со своите борови шуми и планини. Во него ќе сретнете значителен број ирваси и елени, но и помали животни како лисици, зајаци и фоки. Значи, сосема е јасно дека нема да бидат изоставени ниту љубителите на фауната. Иако овде нема првенствено да ја истражувате историјата, веројатно има и такви, а тие можат да се упатат на југ до регионот Траној, каде што има неколку мали музеи кои ја документираат историјата на овој остров.
