Како дел од наследството што ни го остави мајстор силуетата Кристобал Баленсијага, толкувајќи ги иконските креации од 50-тите години, Демна Гвасалија, уметнички директор и современ моден визионер, го претстави ренесансното враќање на кралската елеганција што ја редефинира ерата на високата мода.
Со повлекувањето од социјалните мрежи, на сите ни беше јасно дека се подготвува целосен пресврт во визуелниот израз на познатата модна куќа.
Гвасалија, на препознатлив, авангарден начин, половина век подоцна, откако Кристобал Баленсијага, основачот на легендарната модна куќа, ги затвори вратите на своето студио во 1968 година, отвори ново поглавје. На импозантен начин, тој маестрално манипулира со нов/стар простор и обемни конструкции што ве оставаат без здив.
„Високата мода е основа на оваа куќа, затоа моја креативна и визионерска должност е да ја вратам високата мода во оваа куќа. За мене високата мода е неистражена моќ на креативно изразување и креативна слобода, како и платформа за иновации можности за правење облека, но истовремено носи и модерна визија и ја враќа модната куќа во своите првични почетоци, од каде сè започна“, вели Демна Гвасалија
Препознатлива форма во ново руво, високо-технолошки материјали и необични модни додатоци во форма на брошеви, капи, прстени и обетки донесоа една сосема нова, модерна димензија, што појаснува дека чувството за мода на Гвасал е непогрешлив.
Без музика и специјални ефекти, на авангардни модели, имавме привилегија да видиме уникатна облека, направена по мерка, што носталгично нè враќа во времето кога занаетите и рачно изработените облеки беа најубавиот израз на применетата уметност.
