Очигледно, последниот хит на Стив Аоки нема да биде од типот на музика…
Познатиот диџеј се здружи со брендот „Bulgari“ со цел заедно да создадат луксузен часовник кој ветува дека ќе испушта силен сјај, како светлото од ноќните клубови. Специјалното издание на часовникот е нова варијација на трендовски модел Bulgari Aluminium, кој својата слава ја стекна во текот на 90-тите години на минатиот век. Со елегантна, спортска естетика, часовникот има кул атмосфера, што може да се каже и за Аоки. 49-годишникот, кој е и продуцент и моден дизајнер, секогаш е олицетворение на трендовите на улична облека, а овој часовник лесно може да се вклопи во која било од неговите комбинации на облека.
Часовникот доби лесна алуминиумска кутија со гумена основа што нуди дополнителна удобност. Негов главен детал е бројчаникот, кој е целосно покриен со слојот Super-Lumin, а исто така е украсен со логото на Аоки. Бројчаникот има суптилна бело-сива сенка во текот на денот, но оживува на посебен начин во текот на вечерните часови, добивајќи зелен сјај. Титаниумскиот дел од куќиштето носи друго лого на Аоки, и е обложен со црн DLC слој.
„Времето е една од највредните валути на човештвото и затоа внимателно и детално дизајниравме прекрасен часовник кој се придржува до високите стандарди за квалитет и изработка за кои се залагаме јас и Bulgari “, изјави Аоки. „Јас сум многу горд и возбуден за овој часовник и фактот што можам да го споделам со светот и едвај чекам да ги споделам нашите идни проекти со сите.
Кога станува збор за механизмот, часовникот доби автоматски механизам ETA Bulgari B77 со резерва на енергија од 42 часа. Исто така, часовникот е водоотпорен до длабочина од 100 метри. Цената на овој часовник е 3.050 долари, но веруваме дека неговиот придонес за вашиот стил е од непроценлива важност.
