Имате желба за слатки или сте во искушение да изедете пакет наполитанки или цела чоколада? Одолејте им се на предизвиците и направете квалитетно домашно благо што ќе ја задоволи желбата за шеќер, а нема да и наштети на линијата ако ја јадете во умерени количини. Truffles со лешници потекнуваат од Франција и со децении ги воодушевуваат непцата на вистинските чокохоличари со својот полн вкус.
Состојки:
250 гр темно чоколадо (најмалку 60% какао)
125 мл слатка павлака
25 гр путер
малку сол
1 грст печени лешници
200 гр сецкани лешници
100 гр чоколадо за готвење
состојки по избор (цимет, чили, какао во прав, шеќер во прав)
Подготовка:
Скршете го чоколадото и додадете му сол. Во друг сад растопете го путерот на тивок оган, додадете ја слатката павлака и пред да зоврие, тргнете ја од оган и прелијте со чоколадото.
Мешајте со процесор за храна за да се стопи чоколадото полесно и целосно да се комбинира со путерот и павлаката. Кога чоколадото ќе се стопи и смесата ќе биде изедначена и ладна, ставете ја во фрижидер и оставете ја најмалку два часа.
Извадете ја од фрижидер и формирајте топчиња со дланките, а потоа во секоја притиснете по еден печен лешник. Топчињата превртете ги во растопено чоколадо за готвење во кое претходно сте додале сецкани лешници и прелијте ги со некои зачини.
Послужете ги чоколадните топчиња на празничен начин – украсете го плехот со борови иглички или шеќер во прав на кој ќе нацртате снегулки со прстот.
Пријатно!
