Додека пандемијата на вирусот корона ги држи посетителите подалеку од музеите, славниот Лувр во Париз нуди приватно дружење со Мона Лиза и прошетка по историскиот покрив на францускиот музеј за да се пополни празнината во нејзините финансии.
Оној кој ќе ја даде најдобрата понуда, ќе има можност да биде сведок на годишниот преглед на состојбата на ремек-делото на Леонардо да Винчи. Секоја година, „Мона Лиза“, можеби најпознатата слика на светот, се вади од ѕидот, а стаклената преграда се отстранува за да се провери дали ремек-делото, датирано од околу 1503 година, е загрозено од пукнатини.
Некои светски лидери беа меѓу среќниците што сè сведоци на овој редок настан во последните децении. Аукциската куќа Кристи се надева дека ќе собере повеќе од еден милион евра преку интернет-аукција, вклучувајќи околу 10.000 до 30.000 евра за искуство одблизу со парчето.
Лувр имаше близу 10 милиони посетители во 2019 година, но е затворен повеќе од пет месеци за време на двата карантина поради пандемијата. Додека се отвори ова лето, бројот на посетители падна за 75 проценти. Меѓу делата што ќе одат на аукција се и часовник направен по нарачка на часовничарот Вачерон Константин и прошетка по покривот на 800-годишната палата Лувр со францускиот уличен уметник JR.
„Лувр страда како и сите други музеи низ целиот свет“, изјави Јан ле Тухе, одговорен за односи со покровители на музејот. Тој додаде дека Лувр годинава ќе изгуби 90 милиони евра приход.
