Во минатите неколку месеци, Volkswagen поднесе апликација за заштита на имињата на своите класични модели со префиксот „е“, што укажува на нивно заживување, но со употреба на електричен погон.
На крајот на јуни, VW аплицираше за регистрација на името e-Samba, а потоа се шпекулирало дека може да се користи за производната верзија на концептот ID Buzz, но тој автомобил сепак ќе ја задржи ID ознаката.
Во следните недели, Volkswagen ги регистрираше имињата e-Beetle, e-Golf Classic, e-Kubel и e-Karmann.
Името E-Kubel веројатно се однесува на Kubelwagen, лесно воено возило од Втора светска војна, за кое извршниот директор на Volkswagen, Херберт Дис изјави дека во 2017 година сака да го оживее како електричен модел.
Неофицијалните информации велат дека оживеаните класици нема да бидат произведени директно од Volkswagen, туку дека овие проекти ќе ги преземе компанијата eClassic, специјализирана за претворање на постарите модели во модернизирани електрични автомобили.
Volkswagen го поддржува eClassic, кој веќе произведува електрична верзија на класичните „Буба“ и e-Bulli.
