Поранешниот американски претседател Барак Обама ги избра, меѓу другите, Били Ајлиш, Бијонсе и Френк Оушн за неговиот летен музички список во 2020 година.
Тој на социјалните мрежи ги објави не само своите омилени песни за ова лето, туку и ѕвездите кои ќе настапат на конвенцијата на демократите оваа недела, пишува „Банг шоубиз“.
„Во изминатите неколку месеци, поминав многу време слушајќи музика со семејството. Би сакал да споделам со вас некои од моите омилени песни за ова лето, меѓу кои се и музичарите кои ќе настапат на Демократската конвенција оваа недела. Како и секогаш, тоа е мешавина од жанрови кои патуваат низ различни епохи. Мислам дека има нешто за секого овде – се надевам дека ќе уживате во тоа “, твитна 44-тиот американски претседател и првиот Афроамериканец што дојде на чело на Соединетите држави.
Според Обама, дел од оние кои ќе настапат на Демократската конвенција се Common (Forever Begins), The Chicks (Gaslighter), Billie Eilish (My Future) и Billy Porter (For What It’s Worth), пренесува Си-Ен-Ен.
Дотогаш, од списокот на Обама, можете да ја слушате соработката на John Legend и Koffee „Don’t Walk Away“, како и песната на Leon Bridges и Khruangbin „Texas Sun“.
Меѓу омилените 20 песни на Обама, од списокот со вкупно 53 песни за оваа година, се „Gemini“ на Princess Nokia, „Rank & File“ од Moses Sumney и „Cajendo“ од Frank Ocean.
Обама (59) исто така избра некои класици, како што е хитот на Stevie Wonder „Do I Do“, песната „I’ll Be Seeing You“ од Billie Holiday и „Could You Be Loved“ од Bob Marley.
