Досега Apple работеше напорно за да најде партнер за проектот, па на крајот решија да го развијат автомобилот самостојно.
Иако заглави и направи неколку големи чекори наназад, проектот Apple автомобил сè уште не е мртов. Технолошкиот гигант, најпознат по мобилните телефони, го ангажираше „големиот ѕвер“, Луиџи Тараборели, кој работеше во Lamborghini 20 години. Од 2008 година, тој е шеф на развој на суспензија и управување во италијанскиот производител на суперавтомобили. Неговата работа вклучуваше развој на системи за суспензија, управување, сопирање и помош на возачот на Urus, Huracan и Aventador, како и на ексклузивните Centenario и Veneno. Изгледа дека Apple го „улови“ вистинскиот човек кој ќе се погрижи нивниот автомобил да биде забавен за возење.
Досега, Apple се мачеше да најде партнер за проектот и наиде на многу затворени врати. Пред една година тие преговараа со Hyundai, но планот пропадна бидејќи корејскиот производител не сакаше да го произведува автомобилот на Apple во своите фабрики.
После тоа, Apple се сврте кон Nissan, но тие преговори пропаднаа од истите причини како оние со Hyundai. Малку подоцна се појавија гласини дека преговараат и со Тојота, но и тоа не успеа.
На крајот на краиштата, Apple ја промени тактиката и одлучи да го развие возилото целосно независно, без партнерство со кој било производител на автомобили. Наводно, тие сакаат да започнат со производство веќе во 2024 година, но тоа звучи малку преоптимистички, ако се земе предвид дека развојот на автомобил обично трае околу пет или шест години.
Исто така, тешко е да се поверуваат гласините дека автомобилот ќе биде целосно автономен без никакви контроли како волан и педали. Многу поверојатно звучи тврдењето дека компанијата развива напредна батерија за автомобил.
Apple започна да работи на развојот на нивниот автомобил во 2015 година, но една година подоцна се откажаа и се префрлија на развој на технологии за автономно возење. Во 2020 година повторно се предомислија и решија да направат автомобил. Наводно веќе имаат вработено 200 луѓе кои работат на неговиот развој.
Забелешка-објавените слики не се официјални фотографии од автомобилот на Apple, туку рендери кои окажуваат како може да изгледа автомобилот.
